శరదృతువులో మేఘాలు వర్షించి జగత్తుకు కలిగిన తాపాన్ని తొలగిస్తున్నాయి . అదే విధంగా శరదృతువులో ప్రారంభమయ్యే అమ్మవారి శరన్నవరాత్రుల పూజా ఫలితాలు మనుషుల్లో ఉన్న అజ్ఞాన తాపాన్ని తొలగిస్తున్నాయి . ఈ ఋతువులో తానూ ప్రకృతి రూపంతో ఎంత పచ్చగా వికసిస్తుందో అలాగే మనుషుల్లో జ్ఞానరూపమై సంప్రధూపమై నిలుస్తుంది ఆ జగన్మాత.

                అమ్మలగన్న అమ్మ ముమ్మూర్తులకు ఆది దేవత . అన్ని లోకాలకు పాలించే జగన్మాత, శ్రీ విజయ దుర్గాదేవిగా కడప పట్టణంలో వెలసింది. ఏనాటి పుణ్యమో ఎన్ని జన్మల సుకృతమో ఈ తల్లి మన నగర వాకిట నిలిచి మనందరి అరచేతి మాణిక్యంగా అలరారుతుంది .  పట్టణానికి పడమటి దిక్కున తూర్పుముఖంగా కుదిరిన యోగ్యమైన పవిత్ర స్థలంలో కర్నూలు – చిత్తూరు జాతీయ రహదారి ప్రక్కన అమ్మవారు కొలువుదీరింది.

                 శిల్పకళ , వాస్తు, ఆగమ శాస్త్రజ్ఞులు సాంకేతిక నిపుణులు ఎందరో పండితుల సలహాలను, సూచనలను పాటించి ఏంతో మంది కార్మికులతో అహర్నిశలు శ్రమించి ఈ ఆలయాన్ని నిర్మించినవారు ” శ్రీ దుర్గా ఆటో మోటివ్స్ ” అధినేత శ్రీ సుధా మల్లికార్జున రావు గారు,. వీరు తన సమయ , వ్యయ , ప్రయాసలను వెచ్చించి ఆలయాన్ని ఆధ్యాత్మిక కేంద్రంలా మలిచారు.

                 అమ్మ అనుగ్రహం అందరికీ కావాలి ! అమ్మ దయ ఉంటె చాలు అన్ని సమకూరుతాయి ! ఆ అమ్మ ప్రేమ కోసం మనమంతా ఆరాటపడాలి ! అందరిలో భక్తి భావం పెంపొందాలి అంటారు ఆలయ వ్యవస్థాపకులు . ఈ వినమ్రత, ఈ ఔదార్యమే వారిని సామాన్య మానవ జీవన స్థితి నుంచి మహా మనిషి గా తీర్చిదిద్దింది . నేను కాదు కర్తను మనందరికీ అమ్మవారి కరుణయే కారణం , ఇదంతా అమ్మ ఆశీర్వాద భలం , జరిగే కార్యక్రమాన్ని అమ్మ సంకల్ప రూపాలే అంటారు శ్రీ సుధా మల్లికార్జున రావు గారు.

                 పురాతన ఆలయ నిర్మాణ సంప్రదాయాన్ని పుణికి పుచ్చుకున్నట్టుగా ఆగమ శాస్త్ర నియమాలకు అనుగుణంగా ఆలయ నిర్మాణం జరిగింది . రండి ! రారండి ! అమ్మను దర్శించి తరించండి అని ఆహ్వానిస్తున్నట్లుగా సుందరమైన సింహద్వారం స్వాగతం పలుకుతుంది . యాత్రికులకు , బాటసారులకు  బహుదూరం నుంచి గమనించినా అమ్మవారి నివాసం ఇదే ! అని సూచించే విధంగా 46 అడుగుల ఎత్తేన ధ్వజ స్తంభం కనబడుతుంది.  అమ్మవారికి ఎదురుగా ఆమెకు ఏంటో ప్రీతి అయినట్టి వాహనం మృగరాజును ప్రతిష్టించారు. ఎల్లయ్య మండపంలో పరమ పవిత్రమైన శ్రీ చక్రమేరువును ప్రతిష్టించారు . సహజంగా ఆ అన్ని చోట్ల భక్తుల గోత్రనామాలతో అర్చకులు శ్రీ చక్రార్చన చేస్తారు. కానీ ఈ విజయ దుర్గా దేవి ఆలయంలో భక్తుల చేత స్వయంగా శ్రీ చక్రార్చన చేయిస్తారు. ” మూలమంత్రాత్మికా ములకుటత్రయ కళేబరా ” సరస్వతి, లక్ష్మి , పార్వతి అనే ముగ్గురు శక్తులతో కూడినది శ్రీ చక్రం. శ్రీ చక్రాన్ని పూజించిన వారికి సర్వస్వతి విద్యను, లక్ష్మి సంపదను, పార్వతి శక్తిని సౌభాగ్యాన్ని ప్రసాదిస్తుంది అని  లలితా సహస్రనామాలలో చెప్పబడింది .

            ఇక ముఖ్యమైనది  అమ్మవారి విగ్రహం. ఆలయ మండపం నుంచి కొంచెం ముందుకు వెళితే చతుర్విధ ఫలపురుషార్థాలను ప్రసాదించే ఆ తల్లి శ్రీ విజయదుర్గా దేవి సరిగ్గా నాల్గవ వాకిట దర్శనమిస్తుంది . ” సహస్రరతి సౌందర్య శరీరాయైనమొనమః ” అనే ఆమె నామ వైభవాన్ని ప్రత్యక్షంగా చూడవచ్చు. ఎంత చుసిన తనివి తీరని ఆ రూపం , చిరు దరహాసంతో కూడిన అమ్మ వారి ముఖారవిందం భక్తుల్ని పలకరిస్తున్నట్లు అనిపిస్తుంది . శంఖము , చక్రము, గద , ఖడ్గము మొదలైన ఆయుధాలు ధరించి సూర్యచంద్రులను సిగలో సింగారించుకొని అభయ హస్తాన్ని చూపుతూ సర్వమంగళ అయినా అమ్మ మనకు దర్శనమిస్తుంది . ఒక సారి దర్శించిన వారు పునర్దర్శనానికి తహతహలాడతారు.  మనిషి పురోగతి , గ్రహస్థితిపైన ఆధారపడి ఉంది అన్నది జ్యోతిష్య శాస్త్రజ్ఞుల అభిప్రాయం , ఆ గ్రహాలూ కూడా పరాశక్తి ఆధీనంలోనే సంచరిస్తున్నాయి కాబట్టి నవగ్రహాలను ఆయాల ఈశాన్య భాగంలో ప్రతిష్టించారు.

            విజయాలకు మూలమైన ఈ విజయ దుర్గమ్మ కడపలో కొలువైనది మొదలు నేటి వరకు భక్తులు తండోప తండాలుగా వస్తున్నారు. ప్రతి మంగళ , శుక్రవారాలలో జరిగే విశేష పూజలలో అశేషంగా పాల్గొంటారు. కష్టాలు తీర్చుకొంటున్నారు. కోరికలు నెరవేర్చుకొంటున్నారు. నిత్యా, వార, పక్ష, వార్షిక మహోత్సవాలలో పాల్గొని భక్తులు తరిస్తున్నారు. ఇప్పుడు కడప నగరంలో ఈ విజయదుర్గా ఆలయం సందర్శకులకు గొప్ప పర్యాటక క్షేత్రంలా మారింది.

                                              

                  ఆలయంలో జరిగే నిత్యా అర్చన మరియు విశేష పూజా కార్యక్రమాలను చూడగా ఏంటో ఆశ్చర్యం కలుగుతుంది . కారణం ఆలయ అర్చకులు చేయు ప్రతి ఉపచారము ఎదో సాధారణంగా చేస్తున్నట్టుగా మనకు అనిపించదు. స్వయంగా మాతృమూర్తికి కుమారులు ప్రేమతో పరిచర్య చేస్తున్నారా! అన్నట్లుగా ఉంటుంది . బ్రహ్మీ ముహూర్త సమయంలో మంగళవాయిద్యముల నడుమ అర్చకులు సుప్రభాత సేవను నిర్వహిస్తారు. అమ్మవారిని మెలోకొలిపేటి సన్నివేశం చూసే వారికి ఏంటో ఆనందాన్ని చేకూరుస్తుంది. అమ్మవారి అర్చనాది కార్యక్రమములను శాక్తేయ ఆగమోక్తంగా నిర్వహిస్తారు. ప్రతి నిత్యం పవళింపు మూర్తికి అభిషేకాన్ని నిర్వహిస్తారు. అనంతరం సహస్రనామ, అష్టోత్తర శాత నామాలతో అర్చన చేసి మహా మంగళ హారతులను ఇస్తారు. ఈ మహామంగళహారతులను దర్శించిన వారికి కూడా మంగళం చేకూరుతుంది అని భక్తులు విశ్వసిస్తూ ప్రత్యేకంగా ఈ హారతులను దర్శించడానికి వస్తూ ఉంటారు. యధావిధిగా సాయంత్రం కూడా ఆరాధన నిర్వహించి రాత్రి 9 గంటలకు పవళింపు సేవ చేస్తారు. వారు జోలపాడి అమ్మవారిని నిద్రపుచ్చేటటువంటి సన్నివేశం చాలా వైభవంగా ఉంటుంది. నిత్యా యాంత్రిక జీవనంలో అలసి సొలసినటువంటి వారు మానసిక ప్రశాంతత పొందడము కోసం ప్రత్యేకించి ఈ సేవను దర్శిస్తారు. 

                 కడప విజయదుర్గ అమ్మవారి మహిమ విశేషాలకు సాక్ష్యంగా సూర్యుడు మార్చి 17 నుండి 23 వ తేదీ వరకు దక్షిణాయణం నుండి ఉత్తరరాయణానికి , అలాగే సెప్టెంబర్ 18 నుండి 23 వ తేదీ వరకు ఉత్తరరాయణం నుండి దక్షిణాయనం వెళ్ళేటప్పుడు భూమధ్యరేఖను తాకుతూ ధృవం మారుతూ ఉంటాడు. ఆ సమయంలో తానూ ఆ అమ్మవారి దీవెనలను అందుకొని గడవబోయే కాలమంతా జగత్తుకంతటికి దేదీప్యమానమైన కాంతిని అందించడానికి కావలసిన శక్తిని పొందడానికైనా అన్నట్టుగా ! ఆ కాంతి కిరణాలు నేరుగా గర్భగుడిలోని అమ్మవారి పాదాలనుండి శిరస్సుదాకా వెళ్లి మరలా వెనక్కు వెళ్లిపోతాయి. ప్రతియేటా జరుగుతున్న ఈ వైజ్ఞానిక సాదృశ్యాన్ని దర్శించి, పులకరించి తరిస్తున్న  వేళా భక్తులే ఇందుకు సాక్ష్యం . అష్టాదశ మహాశక్తిపీఠాలలో ఒకటైన కోర్హాపురం శ్రీ మహాలక్ష్మి ఆలయంలో ప్రతి ఏడాది సరిగ్గా ఇదే దృశ్యం కనపడుతుంది.  ఆ మూడు రోజులు భక్తులు విశేషంగా వచ్చి దర్శిస్తుంటారు. ఈ విశేషాల్ని ” కిరణ్ ఉత్సవ్” అన్న పేరుతొ వైభవంగా జరుపుకొంటారు.